gemill

Guðjón Emilsson heiti ég. Nemi i Kaupmannahofn.

fimmtudagur, júní 23, 2005

Ég ákvað að setja tvo linka sem fjalla um víngerð á síðuna, en þannig er mál með vexti að mig hefur lengi langað til að prófa að brugga en hef aldrei komið því í verk, sökum lítils pláss og startkostnaðar. En í apríllok lét ég loks til skarar skríða og fékk hann Gísla með mér í lið. Hann hjálpaði mér að koma mér af stað og hefur gefið mér mörg góð ráð á meðan á brugginu hefur staðið. Útkoman eru 29 flöskur af rauðvíni og 41 flaska af bjór. Þetta hefur gengið alveg prýðilega (þó ég hafi ekki smakkað þetta ennþá) og bíður þetta bara í lageringu þessa dagana.

Annars virðist vera útlit fyrir einhverja vætu á Eyrarbakka um helgina, þannig að Blásýra þarf líklega að vera í tjaldi á Túngötunni. En maður vonar að hægt verði að redda svoleiðis smáatriðum.

miðvikudagur, júní 22, 2005

Ég er nú nokkuð ánægður með að það líði ekki nema 2 mánuðir á milli blogga hjá mér. Það kalla ég gott núorðið, af því að ég hef nú ekki verið með þeim duglegustu í vefbókununum undanfarið. Annars staðar hefur maður verið duglegri við skriftir en það er í vinnunni. Í vinnunni (þ.e. Hagfræðisviði Seðlabankans) snýst talsvert um skriftir og líkar mér það mjög vel. Ég er s.s. að skrifa í ársfjórðungsritið Peningamál og mánaðarritið Hagvísa m.a.

Annars er það að frétta að um síðustu helgi var frábær 17. júníhelgi sem verður líklega lengi í minnum höfð. Frábært veður og svona og síðan fengum við Kristín frábæra gesti frá Manchester. Það voru Ágústa systir Kristínar og Andy kærastinn hennar, og Emma systir Andys og Christian maðurinn hennar. Við fórum með þau í bæinn og sýndum þeim hvernig á að hafa það gott í Reykjavíkinni. Christian átti nú alltaf svolítið erfitt með að bera fram nafnið mitt og kallaði mig því bara "Guido" sem var frekar fyndið. Á sunnudaginn var síðan farið á Eyrarbakka og snæddur frábær kvöldverður, þar sem Grillaður humar var í forrétt, Lambalæri var í aðalrétt og heimatilbúinn ís í eftirrétt. Síðan tók við mikið fjör. Við Christian vorum hamslausir á hljóðfærin, hann á gítarinn og ég á slaghörpuna. Mér þótti hann nú alveg frábær þegar við vorum að spila íslensku útilegulögin (sem hann hafði vitanlega aldrei heyrt áður) en af mikilli list gerði hann það. Nú síðast en ekki síst er mín elskulega kærasta að útskrifast sem Táknmálsfræðingur frá Háskólanum á laugardaginn og verður þá voða mikið húllum hæ.