Gleðilegt nýtt ár!!!

Það er nú langt liðið á árið en það er alltaf tímabært að óska fólki gleðilegs nýs árs. Ég ætla nú ekki að vera með einhvern Áramótaannál en gaman er að spekúlera í því sem er heitt á könnunni fyrir þetta ár. Hvernig verða kosningarnar? Ég trúi að þetta verði æsispennandi barátta. Nú svo eru strákarnir okkar að fara að keppa á HM í handbolta svo íþróttalega gefur nýtt ár góða raun. Svo er fróðlegt að fylgjast með hvernig milliríkjamál Bandaríkjanna og Íraka og jafnvel alls heimsins munu þróast. Ætli Bush láti til skarar skríða? Vonum bara ekki!!!!

Fyrir mitt leiti var árið 2002 bara mjög gott miðað við þau 23 ár sem ég hef verið á þessari jarðarkringlu. Ég minnist alveg snilldar utanlandsferðar með kórnum til Danmerkur og Svíþjóðar sem stendur upp úr í sumar. Skólinn gekk mjög vel og margar breytingar áttu sér stað sem voru til góðs og því er hægt að segja að allt þetta góða hafi vegið út verri hluti. En þó er nú eitt sem gerðist sem maður kýs aldrei. Að missa vin í bílslysi er nokkuð sem óneitanlega tekur á.

Nýja árið leggst bara vel í mig og vona ég að svo sé hjá öllum. Nú er maður kominn í hörkuna (þ.e. á Bókhlöðuna) að undirbúa sig fyrir komandi vertíð.